Монгол Улсын Ерөнхийлөгч жил бүр 100-аас дээш настай ахмад буурлууддаа  гарын бэлгээ гардуулдаг уламжлалтай. Сэлэнгэ аймгийн Ерөө сумын харьяат өндөр настан эдүгээ 102 насыг зооглоод буй Б.Нанзад гуайд Монгол Улсын Ерөнхийлөгчийн гарын бэлгийг аймгийн иргэдийн Төлөөлөгчдийн Хурлын дарга Г.Бат-Орхон гардуулан өгч хүндэтгэл үзүүллээ.

Б.Нанзад гуай Сэлэнгэ аймгийн Зүүнбүрэн сумын Охиндий гэх газарт 1923 онд төрж улмаар төрөлх сумынхаа сургуульд насаараа багшилж, олон зуун шавь нараа эрдэм мэдлэгийн их далайд хөтлөн замчилж явжээ. Тэрээр 5 хүү, 5 охин арван сайхан хүүхдийг эх орондоо өсгөн хүмүүжүүлсний зэрэгцээ тэдний үр хүүхэд, ач гуч нь одоо нийтдээ 200-г хол давсан өнөр олуулаа болоод буйгаа хуучиллаа. Түүний том охин нь 80 настай, хамгийн бага нь 60 шахаж яваа аж. Азай буурай маань зуу давж насалсан ч ухаан саруул, хэл яриа цэгцтэй байгаа нь аргагүй л ардын багш явсныг нь илтгэнэ.

17-р жарны модон Могой жилийн сар шинийн босгон дээр төр засгаас түүний өндөр насыг хүндэтгэн үзсэнд ихэд талархаж байлаа. Аймгийн иргэдийн Төлөөлөгчдийн Хурлын дарга Г.Бат-Орхон өндөр настан Б.Нанзад гуайд ирэх жилийн сар шинээр эргэн уулзахын ерөөл дэвшүүлж, урт насалж удаан жаргахыг хүсэн ерөөлөө.