Мал төллөх, малын үс ноос хяргах, ямаа самнах
гээд жил бүрийн өдийд малчдын ачаалал эрс нэмэгддэг билээ. Энэ цаг үед Аймгийн
ИТХ-ын Ажлын албанаас “Шинэ цагийн илгээлтийн эзэд” сайн дурын бүтээлч ажлыг
санаачлан аймгийн ИТХ-ын Хүнс, хөдөө аж
ахуйн байнгын хороо,“Эрч хүч” ОНӨҮГ, Хөдөө аж ахуйн мал үржлийн тасгийн хамт
олонтой хамтран Эрдэнэбүрэн сумын Шураг багийн малчин Н.Олонбаярын хотонд нэг
өдрийг өдөр тутмын ажилд нь туслаж өнгөрүүллээ.
Малчин Н.Олонбаярынх аймгийн
төвөөс 45км, сумын төвөөс 22 км зайд орших Хагийн хонлой гэх газар хаваржиж, мал
сүргээ таван төрөл дээр нь өсгөж буй сумын сайн малчин. Энэ хавар 350 гаруй төл
хүлээн авах юм байна. Төл хүлээн авах
үеэр хүн хүч дутагддаг учир хүү О.Батбаатар, О.Болдбаатар нарыгаа хичээлээс нь
чөлөө авхуулсан хэмээн ярьж байна. Энэхүү ажлын хүрээнд дээрх
байгууллагаас малын нэмнээ, төл хүлээн авах уут, малын тэжээл, хүнсний зүйл
өгснөөс гадна өвсний хашаа барьж, малын хашаанд ариутгал хийжээ. Аймгийн
хэмжээнд үйл ажиллагаа явуулж буй байгууллагууд энэхүү сайн дурын бүтээлч
ажлаас санаа авч олон малчидад их ажлын үед тус дэм болоосой хэмээн Аймгийн ИТХ-н Ажлын албанаас
уриалж байна.
