Энэ өдрийг аймгийн хэмжээнд гамшгийн аюулын тухай зарлан мэдээллийн дохиогоор ажиллах дадлага, сургуультай уялдуулан 3-р сарын 23-ны өдрийн 16:00 цагт зохион байгуулахаар аймгийн Онцгой байдлын газраас төлөвлөжээ.
Энэ өдөр гамшгаас хамгаалах албад, ААН, байгууллага, сургууль, цэцэрлэгийн хүүхдүүдэд газар хөдлөлтийн аюулаас урьдчилан сэргийлэх, аюулгүй байдлаа хангах чиглэлээр сургалт, дадлага ажил зохион байгуулах аж. Мөн шинэчлэн батлагдсан Гамшгаас хамгаалах тухай хуулийг сурталчлах, аймгийн Онцгой комисс, гамшгаас хамгаалах албад, мэргэжлийн ангийн бүрэлдэхүүнийг зарлан мэдээллийн дохиогоор ажиллуулж бэлэн байдлыг шалгаж, үнэлэлт өгөх юм байна. Тухайн өдөр иргэд дадлага сургалтад идэвхтэй оролцож дуут дохио дуугарах үеэр айж сандралгүй, мэргэжлийн байгууллагаас өгөх заавар зөвлөмжийг даган ажиллахыг Онцгой байдлын газраас зөвлөж байна.
