Япон Улсаас Монгол Улсад суугаа Онц бөгөөд Бүрэн эрхт Элчин сайд Масато Такаока энэ сарын 26, 27-ны өдрүүдэд манай аймагт айлчилж байгаа билээ. Тэрээр /2017.09.26/ “Дарханы Төмөрлөгийн үйлдвэр” ХК-ийн үйл ажиллагаатай танилцаж, аймгийн ИТХ-ын дарга Г.Эрдэнэбат болон тус байгууллагын удирдлагуудтай санал солилцлоо. 
24 жилийн тэртээ тус үйлдвэр Япон Улсын туслалцаатайгаар байгуулагдсан бөгөөд Япон Улсын хамтын ажиллагааны байгууллага болох Жайкагаас мэргэжилтнүүд ирж, 10 гаруй жилийн хугацаанд үйлдвэрийн ажилчдад заавар, зөвлөгөө өгч байжээ. Өнөөдрийн уулзалтаар 2 тал боловсон хүчин бэлтгэх, ажилчдыг нарийн мэргэжилд сургах, хуучирсан тоног төхөөрөмжийн шинэчлэл зэрэг асуудлуудыг хөндөн ярилцав.
Элчин сайд Масато Такаока мөн Төмөр замын Дархан-2 өртөө болон, аймгийн Музейн үйл ажиллагаатай танилцсан юм. 
