АНУ-ын Элчин сайдын яамны Олон нийттэй харилцах албанаас төлөөллүүд манай аймагт 2 өдрийн турш ажиллаж, АНУ-д тэтгэлэгтэй суралцах боломж, элчин сайдын яамнаас хэрэгжүүлдэг төсөл хөтөлбөрүүдийн талаар олон нийтэд нээлттэй танилцууулга мэдээлэл хийсэн юм. Өнөөдөр буюу 2017 оны 10 дугаар сарын 16-ны өдөр тус албаны дарга Кристоф Марк болон боловсролын солилцооны хөтөлбөр хариуцсан ажилтан Х.Саруул нарыг аймгийн Засаг дарга С.Насанбат хүлээн авч уулзлаа. Уулзалтаар гурван чухал асуудлыг хөндөж ярилцсан. Нэгдүгээрт, Дархан-Уул аймагт ажиллаж амьдарч байгаа 4000 гаруй төрийн албан хаагчдын гадаад хэлний болон мэргэжлийн чадавхийг сайжруулах, бэхжүүлэх, ажлын байрны болон гадаадын сургалт хөтөлбөрүүдэд хамруулах чиглэлд дэмжлэг үзүүлэх хоёрдугаарт, Америкийн соёлын төвийг Дархан-Уул аймагт нээн хүүхэд залуучуудад тус орны соёл боловсрол, улс төр, нийгмийн салбарын өргөн хүрээний мэдлэгийг олгох тал дээр хамтран ажиллахыг, гуравдугаарт Дархан-Уул аймгаас АНУ-д хөдөө аж ахуй, барилга, барилгын үйлдвэрлэлийн салбарт ажилтан гаргах, дадлагажуулах асуудлаар тус тус ярилцаж санал солилцлоо. Тэтгэлэгт хөтөлбөр, төслийн мэдээллүүдийг АНУ-ын элчин сайдын яамны вэб хуудас, Фэйсбүүк хаягуудаас авах боломжтой.