УИХ-ын гишүүн О.Батнасан хэлэхдээ: Өвөлжилтийн бэлтгэл ажлыг хангуулах талаар уг нь 7,8 дугаар сарын сүүлчээс л ярьж эхэлсэн. Ховд аймагт 09 дүгээр сарын 09-ний өдөр Бямбацогт гишүүнтэй хамтраад Малчдын зөвлөлгөөнийг зохион байгуулж, анхаарах асуудлыг дэвшүүлж, шийдвэрлэх арга замыг ХХААХҮЯ-тай тохирсон. Гэтэл төсвийн тодотгол хэтэрхий оройтож батлагдлаа. Өвлийг өнөтэй давахын тулд малчдад тэжээл хэрэгтэй нь үнэн, гэхдээ хямдхан тэжээл хэрэгтэй байна.
Тэжээл оруулж ирэхээр сонгогдсон компаниудын гааль, НӨАТ-ын хөнгөлөлт үзүүлээд, эргэлтийн хөрөнгийн санхүүжилтийг нь шийдчихээр тэжээлийн үнэ хямдхан болж чадах уу? Хэрэв тодорхой үнэ тогтоохгүй л юм бол мэдээж ашгийн төлөө компаниуд тэжээлээ хямдхан зарна гэсэн баталгаа байхгүй. Харин компани тусгайлан сонгон шалгаруулахгүйгээр, тэжээл оруулж ирэхээр бол гааль, НӨАТ-ын хөнгөлөлт үзүүлэн, эргэлтийн хөрөнгийн санхүүжилтийн дэмжлэг үзүүлэн гээд компаниудын дунд чөлөөтэй өрсөлдүүлчихсэн бол өрсөлдөөний дүнд тэжээлийн үнэ хямдхан тогтож болох байлаа.
