Энэ сарын 7-17-ны өдрүүдэд улс орон даяар мал, тэжээвэр амьтан, хашаа, худгийн тооллого явагдна. Үүнтэй холбогдуулан тооллогыг зохион байгуулах ажлын хэсгүүд гарсан. Дархан сумын хэмжээнд 32 хүний бүрэлдэхүүнтэй 12 ажлын хэсэг өнөөдрөөс ажиллаж эхэллээ. Дархан сумын Засаг даргын орлогч Д.Батбаяр Малчин багт явагдаж байгаа мал тооллогын үйл ажиллагаанд хяналт тавин ажиллаж байна.
Тус баг өнгөрсөн онд нийт 182 өрхийн 29700 толгой мал тоолуулсан бол Дархан сумын хэмжээнд 808 өрхийн 72260 толгой мал тоологдсон юм. Энэ жилийн тооллогоор малчдын ажил эрхлэлт, боловсрол, зээлтэй эсэх, хоршоо нөхөрлөл бүлгийн гишүүн эсэх, ХАА-н үйлдвэрлэлд ажиллаж байгаа эсэх зэрэг нийгмийн байдалтай холбоотой зарим үзүүлэлтүүдийг бүртгэлийн маягтанд шинээр нэмжээ. Компанит ажил зохион байгуулагдаж байгаатай холбогдуулан малаа тооллогод бүрэн хамруулахыг малчид болон мал бүхий иргэддээ уриалж байна.
