Үндэсний эрх чөлөө, тусгаар тогтнолоо сэргээсний баярын өдрийг тохиолдуулан Монгол Улсын Ерөнхийлөгчийн 2017 оны 87 дугаар зарлигаар Дархан-Уул аймгийн Төр захиргаа, хууль хяналт, эрүүл мэнд, боловсрол, эрчим хүч, уул уурхай, төмөр зам, харилцаа холбоо, авто тээвэр, нийтийн аж ахуйн үйлчилгээний салбар болон хувийн хэвшилд олон жил идэвх зүтгэл, үр бүтээлтэй ажиллаж, аймаг, орон нутгийн бүтээн байгуулалт, хөгжил цэцэглэлтэд үнэтэй хувь нэмэр оруулсан 38 иргэнийг Монгол Улсын төрийн дээд одон медалиар өнөөдөр /2017.12.28/ шагналаа.
Салбар салбарын сайчууддаа Монгол Улсын Ерөнхийлөгчийн нэрийн өмнөөс шагналыг нь гардуулж, баяр хүргэхээр аймгийн Засаг дарга С.Насанбат, Засаг даргын үйлдвэрлэл дэд бүтэц, хууль эрх зүйн асуудал хариуцсан орлогч Т.Ганболд, аймгийн ИТХ-ын тэргүүлэгч Б.Батболд, Г.Эрдэнэсүх, Г.Алтантуяа, аймгийн ИТХ-ын Тэргүүлэгчдийн нарийн бичгийн дарга Р.Тунгалаг-Эрдэнэ, ЗДТГ-ын дарга Ч.Энхбат нар хүрэлцэн ирсэн юм.
Уг арга хэмжээний үеэр Хөдөлмөрийн гавъяаны улаан тугийн одонгоор 5, Алтан гадас одонгоор 14, Хөдөлмөрийн хүндэт медалиар 19 хүн тус тус шагнагдаж, энгэрээ мялаалаа.
