Аймгийн ИТХ-ын Тэргүүлэгчид 2017 онд 24 удаа хуралдаж, 145 асуудал хэлэлцэж, хэлэлцсэн асуудалтай холбогдуулан нийт 112 тогтоол батлан гаргаснаас аймгийн Засаг даргад даалгасан заалт бүхий нийт 77 тогтоол батлагдан гарчээ. 
Үүнд Хяналт-шинжилгээ, үнэлгээ, дотоод аудитын хэлтсээс хяналт-шинжилгээ хийж, үйл ажиллагааны гүйцэтгэлийг тавьсан зорилт, хүрэх түвшинтэй нь харьцуулан хэрэгжилтийн түвшинг тогтоосон бөгөөд аймгийн ИТХ-ын Тэргүүлэгчдийн 2017 оны тогтоолын хэрэгжилтийг 97.0 хувь буюу 4.85 онооны үзүүлэлтээр дүгнэсэн тухай аймгийн ИТХ-ын Тэргүүлэгчдийн хуралд ТУЗХ-ийн дарга П.Баярсайхан танилцууллаа.
Аймгийн ИТХ-ын Тэргүүлэгчид уг дүгнэлтийг хэлэлцэн, орон нутгийн шийдвэр гаргах дээд байгууллага болох ИТХ-ын Тэргүүлэгчдээс гаргасан тогтоол нь иргэдийн амьдралд хэр нийцэж, “Хөрсөн дээр бууж байгаа” талаар ИТХ-ын хяналтын хороод газар дээр очиж танилцаж, дүгнэлт гарган ИТХ-д танилцуулж ажиллах, мөн иргэдийн санал сэтгэгдлийг сонсож, тэдний дүгнэлтийг хүлээн авах замаар илүү бодит үнэлгээг гаргах боломжтой хэмээн үзлээ.
Түүнчлэн аймгийн ИТХ-ын Тэргүүлэгчдийн 2017 оны тогтоолын хэрэгжилтэд хөндлөнгийн үнэлгээ хийлгэх санал гаргалаа.
