Монгол Улсын Засгийн газар, Төрийн албаны зөвлөлөөс НҮБ-ын Хөгжлийн хөтөлбөрийн газрын дэмжлэгтэйгээр хамтран зохион байгуулж буй Төрийн албаны удирдах ажилтны улсын зөвлөгөөн Төрийн ордонд зохион байгуулагдлаа.

УИХ-аас 2017 оны арванхоёрдугаар сард баталсан, 2019 оны нэгдүгээр сарын 1-нээс хэрэгжих Төрийн албаны тухай хуулийг мөрдөж, төрийн албаны шинэтгэлийг гүнзгийрүүлэх, төрийн албанд чадахуйн зарчмыг бүрэн хэвшүүлэх, төрийн бүх шатны байгууллагад сахилга хариуцлагыг чангатгах, хариуцлагатай, ил тод, мэргэшсэн, тогтвортой төрийн албыг төлөвшүүлэх зэрэг өргөн хүрээтэй асуудлыг зөвлөгөөнөөр хэлэлцэж байна.

Улсын Их Хурал, Засгийн газрын яам, агентлагууд, нутгийн захиргааны байгууллагын төлөөлөл, олон улсын шинжээчдээс бүрдсэн 800 төлөөлөгч оролцож буй тус зөвлөгөөнд Монгол Улсын Ерөнхийлөгч Х.Баттулга мэндчилгээ, Монгол Улсын Ерөнхий сайд У.Хүрэлсүх илгээлт ирүүлж, Монгол Улсын Их Хурлын дарга М.Энхболд үг хэлэв.

Тэрбээр хэлсэн үгэндээ "Төр нь тогтворгүй болохоор албан хаагч нь мэргэшиж чадахгүй байна. Мэргэшсэн албан хаагч ховордсоноос төрийн дархлаа суларлаа. Энэ бол энгийн хийгээд гарцаагүй үнэн. Төрийн алба шударга бус, тогтворгүй, дархлаагүй байгаа цагт бүтээсэн нийгмийн баялаг үрэн таран болдог, иргэдийн амьдралд олигтой өөрчлөлт гардаггүй, эцэст нь бухимдал дургүйцэл улам газар авдгийг дэлхийн зарим улс орнуудад тохиосон сургамжаас бид мэднэ. Төрийн алба нь чадавхитай, дархлаатай, тогтвортой улс орнуудад л нийгмийн хөгжил дэвшил, ард нийтийн амьдралын чанар, хүний хөгжлийн зам нээгддэгийг бид бас гадарлана.

Тиймээс төрийн албаны шинэчлэлийн дараагийн шатыг эхлүүлэх шаардлагатай гэдгийг УИХ-ын индрээс миний бие нэг бус удаа анхааруулж хэлснийг Та бүхэн санаж байгаа байх.

 Улмаар бид 2017 оны намрын чуулганаараа "Төрийн албаны тухай хууль"-ийн шинэчилсэн найруулгыг хэлэлцэж, баталсан. Ингэснээр төрийн албаны шинэчлэлийн шинэ үеийг эхлүүлэх томоохон алхам хийж чадсан гэж үзэж байна. Одоо энэ хуулийн үзэл санааг шинэ агуулгаар нь, мөн чанараар нь ойлгож, Монголын ирээдүйд нөлөөлөх ач холбогдлыг нь ухамсарлаж, хэрэгжүүлэх нь Та бүхний, нийт төрийн албан хаагчдын, иргэн бүхний журамт үүрэг мөн.  

 Төр бол ямар нэг байшин барилга, эсвэл аппарат хэрэгсэл биш, ердөө л төрийн нэрийн өмнөөс ажил алба эрхэлж, иргэддээ үйлчилгээ үзүүлж буй хүмүүс юм. Тиймээс монгол төрийг би төлөөлж байгаа гэдгээ төрийн албан хаагч бүхэн ухамсарлан ойлгож, ёс зүй, хариуцлагыг эрхэмлэж, ажилдаа чин сэтгэлээсээ хандаж, мэдлэг чадвараа бүрэн зориулж ажиллах ёстой. Өөрөөр хэлбэл Та бүхнээс төрийн албаны шинэчлэлийн хувь заяа ихээхэн хэмжээгээр шалтгаална гэдгийг зориуд сануулъя" хэмээн онцлон тэмдэглэлээ.

Нэгдсэн хуралдаанаар Төрийн албыг шинэчлэх шаардлага, Төрийн албаны шинэчлэлийн бодлого, Төрийн албанд чадахуйн зарчмыг мөрдүүлэх нь, Иргэн төвтэй төрийн үйлчилгээ: Олон улсын туршлага гэсэн үндсэн сэдвүүдээр үргэлжлэв.

УИХ-ын гишүүн, Засгийн газрын ХЭГ-ын дарга Г.Занданшатар (Монгол Улсын Засгийн газрын гурван тулгуурт хөгжлийн бодлого: Төрийн албыг шинэчлэх шаардлага), УИХ-ын гишүүн Д.Тогтохсүрэн (Төрийн албаны тухай хуулийн шинэ үзэл баримтлал), Төрийн албаны зөвлөлийн дарга Б.Цогоо (Төрийн албаны тухай хуулийг хэрэгжүүлэхэд анхаарах асуудлууд), НҮБ-ын Хөгжлийн хөтөлбөрийн Нью-Йорк дахь төвийн Засаглалын бодлогын ахлагч Хосе Круз Осорио (Төрийн албаны шинэчлэлийн олон улсын чиг хандлага), БНСУ-ын Хүний нөөцийн удирдлагын яамны Олон улсын хамтын ажиллагааны дэд дарга Санди Сёо Ёнг Ли (Төрийн албаны ерөнхий шалгалт, мэргэшүүлэх сургалтын агуулга: БНСУ-ын туршлага), Бүгд Найрамдах Гүрж Улсын Ерөнхий сайд асан, "Реформатикс" төвийн захирал Ника Гилаури (Төрийн үйлчилгээний үр ашгийг дээшлүүлэх шинэчлэл: Гүржийн туршлага), Сингапур Улсын Төрийн албаны сургуулийн захирал асан Дэвид Ма (Төрийн албанд чадахуйн зарчмыг мөрдүүлэх нь: Төрийн албан хаагчийн гүйцэтгэлийн удирдлага-Сингапурын туршлага) нарын зэрэг 10 гаруй хүн илтгэл тавилаа.

Төрийн албаны удирдах ажилтны улсын зөвлөгөөн  хоёр дахь өдрөө "Төрийн албаны хүний нөөцийн бодлого", "Төрийн албан хаагчийг мэргэшүүлэх, чадавхжуулах хэрэгцээ шаардлага", "Төрийн албан хаагчийн сахилга хариуцлага", "Иргэн төвтэй үр дүнд чиглэсэн  төрийн алба",  "Төрийн албан хаагчийн үйл ажиллагааны баталгаа" сэдвээр таван Салбар хуралдаанаар үргэлжлэв.

Салбар хуралдаануудаар төрийн албаны хүний нөөцийн бодлогын шинэчлэл, ерөнхий болон тусгай шалгалт өгөх болзол, журам, мэдээллийн тогтолцоо, хөдөлмөрийн маргаан, маргаан хянан шийдвэрлэх ажиллагаа, сургалтын бодлого, удирдах, гүйцэтгэх албанд тавигдах тусгай шаардлага, албан хаагчийн ёс зүйн хэм хэмжээ зэрэг асуудлаар 15 илтгэл хэлэлцлээ.

Хэлэлцсэн илтгэлтэй холбогдуулан зөвлөгөөнд оролцогч 100 шахам хүн үг хэлж, давхардсан тоогоор 200 гаруй санал дэвшүүлжээ. Эдгээр саналыг төрийн албыг шинэтгэх үйл явц, Төрийн албаны тухай шинэ хуулийг дагалдан гарах шинэ журмууд, бусад эрх зүйн актуудад тусгах юм. Зөвлөгөөнөөс Монгол Улсын нийт төрийн албан хаагчдад хандан Зөвлөмж гаргалаа.

Хоёр өдөр үргэлжилсэн Төрийн албаны удирдах ажилтны улсын зөвлөгөөн дэвшүүлсэн зорилтоо амжилттай хэрэгжүүлж, ийнхүү өндөрлөлөө.