Дархан сумын Иргэдийн төлөөлөгчдийн хурал, Засаг даргын тамгын газар, Газрын харилцаа, барилга, хот байгуулалтын газар хамтран газрын төлбөрийн хэмжээг шинэчлэн батлахтай холбогдуулан эрх, хууль ёсны ашиг сонирхол нь хөндөгдөх газрын төлөгч иргэн, хуулийн этгээдэд газрын төлбөрийн суурь үнэ, хувь хэмжээг сурталчлан таниулах, нийтийн санал бодлыг тусгах, оролцох боломжоор хангах зорилгоор өнөөдөр /2018.10.23/ хэлэлцүүлэг зохион байгууллаа. Уг хэлэлцүүлэгт ГХБХБГ-ын  удирдлагын хэлтсийн дарга Г.Нямдорж, газрын төлбөр тооцоо, үнэлгээ хариуцсан мэргэжилтэн Ц.Чулуунцэцэг, Кадастрын асуудал хариуцсан мэргэжилтэн Д.Батчулуун нар мэдээлэл хийж, иргэдийн асуултад хариулж, санал хүсэлтийг хүлээн авлаа.
    Монгол улсын Засгийн газрын 1997 оны 06 дугаар сарын 25-ны өдрийн 152 дугаар тогтоол хүчингүй болж, 2018 оны 08 дугаар сарын 20-ны өдрийн 182 дугаар тогтоолоор Газрын үнэлгээний тойрог, зэрэглэл /бүс/, суурь үнэлгээ, газрын төлбөрийн хэмжээ шинэчлэн батлагдсан бөгөөд 1997 оны 152 дугаар тогтоолоор Дархан сумын нутаг дэвсгэр 5 үнэлгээний бүстэй, газрын суурь үнэ 300,0 сая төгрөг буюу газар ашиглалтын зориулалтаас үл хамаарч нэгэн адил суурь үнийг хэрэглэж байсан бол 2018 оны 182 дугаар тогтоолоор 13 үнэлгээний бүстэй, газрын суурь үнэ газар ашиглалтын зориулалтаас хамаарч Гэр бүлийн хэрэгцээ, ХАА-н үйлдвэрлэл, ХАА-н бус үйлдвэрлэл, Худалдаа үйлчилгээ гэсэн харилцан адилгүй шинэчлэн батлагдсан байна.