2018 оны 10 дугаар сарын 24

Сумын ИТХ-ын дарга, ИТХ-ын дэргэдэх байгаль орчин, аялал жуулчлал, хүнс хөдөө аж ахуйн ажлын хорооны төлөөлөл, БОХУБайцаагч, цагдаа, “Батширээт сум тохижилт” ОӨНААТУҮГазар хамтран сумын хогийн цэгийн өнөөгийн нөхцөл байдалтай газар дээр нь очиж танилцан цаашид авах арга хэмжээний талаар санал солилцлоо.

Хэдхэн жилийн өмнө хогийн цэгийг цэгцлэх ажлыг зохион байгуулж хог хаягдлыг түрж булах, нүх ухах зэрэг арга хэмжээг авч цэгцэлсэн боловч одоогийн байдлаар хашааны гадуур хог хаясан дотогш орох замаа таглаж хогоо асгасан байдалтай байна. Энэ нь иргэдийн хариуцлагагүй, ухамсаргүй үйлдэлтэй шууд холбоотой юм. Бид хэдий болтол хавар намрын улиралд Эгийн голын эрэг дагуу хог хаягдал түүж хүн хүч, хөрөнгө мөнгөө үргүй зарцуулж байх вэ? Энэ асуудлыг нэн яаралтай шийдвэрлэхээр ажиллаж байна. Цаашид:

1.    Хогийн цэгийг дахин түрж булах

2.    Хогийн цэгийг хашаажуулах / блокон болон торон хашаа барих/

3.    Иргэдрүү чиглэсэн сургалт, сурталчилгааны ажлуудыг зохион байгуулах

4.    Хог хаягдлыг ангилж сурах /шатдаг, шатдаггүй/

5.    Хогийн цэгийг камержуулах

6.    Өрх бүр хогоо ангилан хаях стандартын хогийн савтай болох

7.    Хог хаягдлыг шатаах зуух барих

Гэх мэт саналуудыг гарган хэрэгжүүлэхээр төлөвлөж байгаа болно. Иргэд та бүхэн өөрсдийн саналаа бичиж үлдээгээрэй. Бидний хамтын ажиллагааны үр дүнд сум орон нутаг маань хөгжин дэвших болно.