Аймгийн ИТХ-ын Хүний хөгжил, хөдөлмөр, нийгмийн бодлого хяналтын хороо, Дархан сумын ИТХ-ын Хүний хөгжил, хөдөлмөр, нийгмийн бодлого хорооны Төлөөлөгчид хамтран “Эрсдэлгүй Дархан” 45 хоногийн аяныг эхлүүлсэн.

“Эрсдэлгүй Дархан” аяны хүрээнд аймгийн хэмжээнд аж ахуйн нэгж байгууллагуудын удирдлагуудыг хамруулан ажилтан албан хаагчдынхаа хөдөлмөр эрхлэлт, нийгмийн хамгаалалын асуудлыг шинэ түвшинд гаргах, ажлын байрны нөхцөл байдлыг бодитоор дүгнэх, тулгамдаж буй асуудлыг шийдвэрлэхийг  уриалж, тодорхой үр дүнд хүрэх зорилготой хэмээн Аймгийн ИТХ-ын Хүний хөгжил, хөдөлмөр, нийгмийн бодлого хяналтын хорооны дарга, Төлөөлөгч А.Янжмаа онцоллоо.

Аяны хүрээнд нэн тэргүүнд уриалга гаргаж, ААНБ-уудад хүргэж, хамтран ажиллахаар хүсэлт тавьсан бөгөөд Үйлдвэрчний эвлэлийн холбоо, Ажил олгогч эздийн холбоотой өнөөдөр /2021.06.11/ хамтран ажиллах санамж бичиг байгууллаа.

Санамж бичигт Ажилтан, албан хаагчдын хөдөлмөрлөх эрх зөрчигдөхөөс сэргийлэх, нийгмийн хамгааллын асуудлыг анхаарч ажиллахад чиглүүлэх, ХАБЭА-н шаардлага, стандарт дүрэм журмыг хангаж ажиллах, чанарыг сайжруулах, ажлын байран дахь осол, осолд дөхсөн тохиолдлоос урьдчилан сэргийлэх, Ковидын үеийн болон дараахь эрсдлийг хамтдаа туулахыг уриалах, харилцан туршлага солилцох үйл ажиллагаанд хамтран ажиллах, харилцан дэмжих тухай тусгажээ.

Мөн өнөөдөр ААНБ-уудын удирдах ажилтнуудын болон ХАБЭА-н ажилтан, эмч, эрүүл ахуйч, гүйцэтгэх удирдлагийн хэмжээнд “цогц сургалт” хийх цахим уулзалт зохион байгуулахын зэрэгцээ нийт ажилтны сургалт хийж зөвлөгөө өглөө.