Аймгийн ИТХ-ын Тэргүүлэгчдийн ээлжит хуралдаан өнөөдөр /2021.09.08/ боллоо. Коронавирусийн халдварын нөхцөл байдалтай уялдуулан энэ удаагийн хуралдааныг танхим болон цахимаар зохион байгуулж, 86 хувийн ирцтэй хуралдав. Хурлаар "Орон нутгийн өмчийн ашиглалт, хамгаалалт үр дүнд хийсэн аудитын тайлангийн тухай", "Төрийн дээд шагналд тодорхойлж өргөн мэдүүлэх тухай" гэсэн 2 асуудлыг хэлэлцэв.

Тухайлбал, Аудитыг Монгол Улсын Ерөнхий аудиторын 2021 оны A/ тоот “Аудитын сэдэв батлах тухай”, А/28 тоот “Аудитын төлөвлөгөө батлах тухай” тушаал, Аймгийн ИТХ-ын хүсэлт, Төрийн аудитын тухай хуулийн 6 дугаар зүйлд заасны дагуу “Орон нутгийн өмчийн ашиглалт, хамгаалалт үр дүн”-д гүйцэтгэлийн аудит хийжээ. Ингэснээр нийт 6292.6 сая төгрөгийн зөрчил илэрснээс 20.8 сая төгрөгийн 2 төлбөрийн акт, 8.4 сая төгрөгийн зөрчил арилгуулж, сахилгын шийтгэл тооцуулах 3 албан шаардлага, 6263.4 сая төгрөгийн 17 зөвлөмжийг хэрэгжүүлэн ажиллахаар аймгийн ИТХ, Засаг дарга, Орон нутгийн өмчийн газрын даргад зөвлөмж өгчээ.  

Харин Төрийн дээд шагналд тодорхойлох асуудлын хүрээнд 4 иргэний материалыг Монгол Улсын Ерөнхийлөгчийн Тамгын газарт уламжлахаар болсон байна.