"Би багш- 2021" зорилтот нэвтрүүлэгт аймгийнхаа 1000 гаруй багшийг төлөөлөн амжилттай оролцож, шилдгийн шилдэг багшаар шалгарсан Мандал сумын ерөнхий боловсролын 4 дүгээр сургуулийн газар зүй, биологийн багш Даваасүрэнгийн Мөнхбаатарыг Сэлэнгэ аймгийн иргэдийн Төлөөлөгчдийн Хурлын дарга Б.Нарантуяа хүндэтгэн хүлээн авч уулзлаа.
Аймаг орон нутгийнхаа нэр хүндийг өргөлцөн улсын хэмжээний олон мянган багш нараас манлайлан “Би багш” үндэсний зорилтот төсөл нэвтрүүлгийн амжилтын буухиаг үргэлжлүүлэн яваа Даваасүрэнгийн Мөнхбаатар багшийг Сэлэнгэ аймгийн “Хүндэт тэмдэг”-ээр шагнаж урамшууллаа.
Мөн “Би багш” уралдаанд багш нараа амжилттай сайн бэлтгэн оролцуулж байгаа аймгийн Боловсролын газар, сургуулийн захирал, менежерүүдэд талархал илэрхийллээ.
Дашрамд дурдахад 2019 онд Мандал сумын ерөнхий боловсролын 3 дугаар сургуулийн бага ангийн багш Ц.Аюуш “Би багш” уралдаанд мөн тэргүүлж 100 сая төгрөгийн ялагч болж байсан билээ.
