ЦИРКТ ДУР СОНИРХОЛТОЙ ХҮҮХЭД, ЗАЛУУСТ ЧИНГЭЛТЭЙ ДҮҮРГИЙН 17 ДУГААР ХОРООНД БАЙРЛАХ БЭЛТГЭЛИЙН ЗААЛНЫ ҮҮД ХААЛГА ҮРГЭЛЖ НЭЭЛТТЭЙ
Өнөөдөр /2022.02.09/ Чингэлтэй дүүргийн Иргэдийн Төлөөлөгчдийн Хурлын дарга Б.Мөнхбат, дүүргийн Засаг дарга Н.Батсүмбэрэл, дүүргийн Иргэдийн Төлөөлөгчдийн Хурлын Төлөөлөгч Т.Уламбаяр, Н.Бямбагэрэл, В.Хүрэлбаатар, хоёрдугаар хорооны Засаг дарга Ч.Буянтогтох нар хүүхдийн сурч боловсрох, хөгжих, эрүүл аюулгүй орчинд амьдрах нөхцөл боломжийг бүрдүүлэхэд дэмжлэг үзүүлэх, иргэд, төрийн бус байгууллагаас энэ чиглэлээр гаргасан санал санаачлагыг дэмжих ажлын хүрээнд дүүргийн 17 дугаар хороонд байрлах Чингэлтэй дүүргийн “Зола-Брос” циркийн бэлтгэлийн зааланд зочилж, үйл ажиллагаатай нь танилцлаа. Мөн тус байгууллагын үүсгэн байгуулагч Б.Золбаярт хүүхдүүдэд хүрч үйлчилж, тэдэнд циркийн урлагаар дамжуулан хувь хүний төлөвшил, ёс суртахуун хүмүүжил олгох энэхүү ажилд нь талархал илэрхийлэн амжилт хүсээд, цаашид дүүргийн нөөц боломжийн хүрээнд тус бэлтгэлийн заалны үйл ажиллагааг дэмжин ажиллахаа илэрхийллээ.
Тус заалыг Циркчин Б.Золбаяр хотын төвөөс алслагдмал гэр хороололд амьдардаг хүүхдүүдэд циркээр хичээллэх боломж олгох зорилгоор өөрийн хөрөнгөөр барьж байгуулсан бөгөөд 2019 оны 10 дугаар сард албан ёсоор ашиглалтад оруулжээ.
Б.Золбаярын санаачлагаар 2009 онд “Есөн Өрлөг” хамтлаг байгуулагдсан бөгөөд Араб, Испани, Франц, Япон, Тайвань, Итали, Макао, Орос, Хятад, Хайнань, Голланд, Герман, Швейцар, Монако вант улс, Унгар зэрэг орнуудад Монгол улсаа сурталчланн тоглохоос гадна Олон улсын циркчидийн тэмцээнүүдэд оролцон:
- 2010.10.24-нд БНХАУ-ын ВУХАНЬ хотноо зохион байгуулагддаг Дэлхийн “А” зэрэглэлийн тэмцээнээс Шидэх банзны үзүүлбэрээр “Мөнгөн” цом
- 2012.02.25-нд Испани улсад зохиогдсон олон улсын циркчидийн тэмцээнээс Шидэх банзны үзүүлбэрээр Монголын циркийн 72 жилийн түүхэнд анхны “Алтан” цом
- 2012.10.10-нд Итали улсад зохиогдсон олон улсын циркчидийн тэмцээнээс шидэлттэй акробат үзүүлбэрээр “Хүрэл” цом. Latina, ОХУ-ын Росгосцирк-ын хүндэтгэлийн цом
- 2012.11.12-нд Франц улсад зохиогдсон олон улсын циркчидийн тэмцээнээс Шидэх банзны үзүүлбэрээр “Алтан” цом Grenoble
- 2013 оны 01 сард Испани улсад зохиогдсон олон улсын циркчидийн тэмцээнээс Шидэх банзны үзүүлбэрээр “Алтан” цом , шидэлттэй акробат үзүүлбэрээр “Мөнгөн” цом
- 2015 онд ОХУ-Буриад улсын хүндэтгэлийн диплом
- 2015 оны 11 сард БНХАУ-ын Wuqiao хотноо зохиогдсон Дэлхийн “А” зэрэглэлийн тэмцээнээс Шидэх банзны үзүүлбэрээр “Тэргүүн Мөнгөн” цом
- 2018 оны 11 сард БНХАУ-ын Вухань хотноо зохиогдсон Дэлхийн “А” зэрэглэлийн тэмцээнээс Шидэх банзны үзүүлбэрээр “Алтан” цомоор тус тус шагнуулсан байна.
Энэхүү циркийн сургалтад анхлан суралцагчдаас эхлээд оюутнууд, мэргэжлийн уран бүтээлчид даваагаас баасан гаригт хичээллэдэг бөгөөд мөн хөгжлийн бэрхшээлтэй болон зорилтот бүлгийн хүүхдүүдийг өөртөө итгэлтэй, айдсаа даван туулдаг, өөрийгөө нээх зэргээр найз нөхдийн хүрээг нь тэлж нийгэмшүүлэх зорилгоор циркийн дугуйланд үнэ төлбөргүй суралцах боломж олгодгоороо давуу талтай.
Чингэлтэй дүүргийн “Зола-Брос” цирк сонирхсон хүүхэд бүрд үүд хаалга нь үргэлж нээлттэй ажиллаж байгаа тул хүүхэд, залуус та бүхнийг урьж байна.
ХУРЛЫН АЖЛЫН АЛБА
