Өдөр шөнө тэнцэж, урин цагтай учран золгосны бэлгэдэл хэмээн Казак түмэн Наурызын баярыг жил бүрийн 3 дугаар сарын 22-ны өдөр тэмдэглэсээр ирсэн. Манай аймгийн нийт суурин хүн амын 0.95 хувь буюу 1038 нь Казак угсаатан байдаг юм.
Наурызын баярын өдрөөр Сэлэнгэ аймгийн иргэдийн Төлөөлөгчдийн Хурлын дарга Б.Нарантуяа, Сэлэнгэ аймгийн Засаг дарга Н.Лхагвадорж, Сэлэнгэ аймгийн Засаг даргын орлогч Ц.Рэгзэдмаа нар Жавхлант, Мандал суманд ажиллаж амьдарч байгаа Казак иргэдэд баярын мэнд хүргэж хүндэтгэл үзүүллээ.
Энэ үеэр Жавхлант сумын иргэн, тус сумын иргэдийн Төлөөлөгчдийн Хурлын төлөөлөгчөөр 3 удаа сонгогдон ажиллаж, сум орон нутгийнхаа хөгжил дэвшилд хувь нэмрээ оруулж буй Солтан Молдагариг Сэлэнгэ аймгийн “Хүндэт тэмдэг”-ээр шагнаж урамшууллаа.
