Сүхбаатар дүүргийн Биеийн тамир, спортын хорооны багш, дасгалжуулагчид Засаг даргын Тамгын газарт ажиллаж, албан хаагчдаас бие бялдрын хөгжил, чийрэгжилтийн түвшин тогтоох сорил авч байна.
Монгол Улсын Ерөнхийлөгчийн зарлигаар явагддаг “Бие бялдрын хөгжил, чийрэгжилтийн түвшин тогтоох” сорил нь хүн амыг орчин үеийн эрүүл амьдралын хэв маяг, зан үйлд сургах, аливаа саад, бэрхшээлийг даван туулах бие, сэтгэлийн тэсвэр хатуужилтай болгох, биеийн тамир, спортоор хичээллүүлэх, эрүүл чийрэг бие бялдартай байлгах зорилготой.
Сорил нь хүний бие бялдрын үндсэн таван чанар болох хурд, хүч, уян хатан, тэнцвэр, тэсвэрийн үзүүлэлтэд тулгуурладаг.
Энэхүү бие бялдрын түвшин тогтоох сорилд дүүргийн ИТХ-ын ажлын алба, Засаг даргын дэргэдэх хэлтэс,нэгжүүд бүгд хамрагдах тул баталсан хуваарийн дагуу идэвхтэй хамрагдахыг уриалж байна.
