Өнөөдөр /2022.05.19/ Чингэлтэй дүүргийн Иргэдийн Төлөөлөгчдийн Хурлаас санаачлан дүүргийн Засаг даргын Тамгын газар,  дүүргийн Прокурорын газар,  дүүрэг дэх Улсын бүртгэлийн хэлтэстэй хамтран “Монгол Улсын төрийн болон албаны нууц”, “Хүний хувийн мэдээллийг хамгаалах тухай” хуулиуд, “Цахим гарын үсэг”-ийн талаарх сургалтыг ажилтан, албан хаагчид ажил үүргээ гүйцэтгэхдээ аливаа нууцыг задруулахгүй, эрсдэлээс өөрийгөө хамгаалах, “Цахим гарын үсэг”-ийн талаар мэдээлэл олгох зорилгоор дүүргийн 1-24 дүгээр хороодын хэсгийн ахлагч, Гэмт хэргээс урьдчилан сэргийлэх сайн дурын Иргэдийн зөвлөлийн ахлагч, нарийн бичиг, гудамж, байрны нийтийн эргүүлүүд нийт 600 гаруй ажилтан, албан хаагчдыг хамруулан зохион байгууллаа.

          Сургалтын үйл ажиллагааг дүүргийн Иргэдийн Төлөөлөгчдийн Хурлын даргын Зөвлөх Т.Идэрцагаан нээж, арга хэмжээний ач холбогдлыг дурдаад, сургалтдаа идэвхтэй хамрагдан цаашид олж авсан мэдлэг, мэдээллээ өдөр тутмын ажил амьдралдаа хэрэгжүүлэхийг уриаллаа.

           Мөн дүүрэг дэх Улсын бүртгэлийн хэлтсийн дарга Д.Оюунбилэг “Цахим гарын үсэг”-ийн тухай хууль, түүний ач холбогдол, хэрэглэгдэхүүний талаар мэдээлэл олгох зорилгоор сургалт хийж,  явуулын цахим гарын үсэг олгох үйл ажиллагааг дүүрэг дэх Улсын бүртгэлийн хэлтсийн албан хаагчдаас бүрдсэн баг зохион байгуулан нийт 108 хүнд цахим гарын үсэг олголоо.

           “Төрийн болон албаны нууцын тухай хууль”-ийг 2016 оны 12 дугаар сарын 01-ний өдөр баталж, 2017 оны 9 дүгээр сарын 01-ний өдрөөс эхлэн дагаж мөрдөж байна. Харин “Хүний хувийн мэдээллийг хамгаалах тухай хууль”-ийг 2021 оны 12 сарын 17 өдөр баталж, 2022 оны 05 сарын 01-ний өдрөөс эхлэн дагаж мөрдөж байгаа бөгөөд энэ харилцааг урьд нь буюу 1995 оноос хойш мөн өдөр хүчингүй болгож “Хувь хүний нууцын тухай” хуулиар зохицуулж байсан юм. Хүчингүй болсон хуульд хэрэглэгдэж байсан  хүний хувийн  мэдээллийн төрлийг шинэ хуульд хүрээг нь өргөтгөн баталсан байна.

ХУРЛЫН АЖЛЫН АЛБА