Засгийн газрын Хэрэг эрхлэх газар, Швейцарын хөгжлийн агентлаг хамтран хэрэгжүүлж буй “Нутгийн өөрөө удирдах байгууллагын институцын чадавхыг бэхжүүлэх нь” дэд төслийн хүрээнд Хууль тогтоомж сурталчлах төвүүдийг 2022 онд Баянхонгор, Өвөрхангай аймагт нээсэн юм. Энэ удаад Дархан-Уул аймгийн Хууль тогтоомж сурталчлах төвийг нээлээ.

Монгол Улсын Их Хурал болон түүний Тамгын газрын 2019-2024 оны стратеги төлөвлөгөөнд аймаг, нийслэл, сум, дүүргийн иргэдийн Төлөөлөгчдийн Хурлын дэргэд Улсын Их Хурлын үйл ажиллагааг сурталчлах төв байгуулж, мэдээллийн нэгдсэн сүлжээнд холбон, албан бус боловсролын болон зайны сургалтын арга, хэлбэрээр иргэдэд хууль, эрх зүйн мэдлэг олгох, хууль тогтоомжийг сурталчлах ажлыг үр нөлөөтэй зохион байгуулах, ЕБС-ийн сурагчид, их, дээд сургуулийн оюутан залууст зориулсан Парламентын боловсролын хөтөлбөрийг боловсруулан хэрэгжүүлэх зэрэг бодлогын зорилтуудыг дэвшүүлсэн байдаг.  

Дархан-Уул аймгийн Хууль тогтоомж сурталчлах төвийн үйл ажиллагааны хэвийн, тасралтгүй байдлыг хангахад талуудын хүлээх эрх, үүргийг тодорхойлж, хууль тогтоомжийн хүрээнд хамтран ажиллахаар Улсын Их Хурлын Ерөнхий нарийн бичгийн дарга, хууль зүйн ухааны доктор Л.Өлзийсайхан, Дархан-Уул аймгийн иргэдийн Төлөөлөгчдийн Хурлын дарга С.Насанбат нар энэ үеэр Хамтран ажиллах санамж бичигт гарын үсэг зурлаа.

Хамтран ажиллах санамж бичиг байгуулснаар ийнхүү Хууль тогтоомж сурталчлах төв Дархан-Уул аймгийн иргэдийн Төлөөлөгчдийн Хурлын дэргэд нээгдэх эрх зүйн орчин бүрдэх юм. Нээлтийн арга хэмжээнд Засгийн газрын Хэрэг эрхлэх газрын дэд дарга У.Бямбасүрэн, Швейцарын Холбооны Улсын Гадаад хэргийн дэд сайд бөгөөд Швейцарын хөгжлийн агентлагийн Ерөнхий захирал, Элчин сайд Патрисиа Данци, Швейцарын хөгжлийн агентлагийн дарга Стефани Бурри, Улсын Их Хурлын Тамгын газрын дэд дарга Ц.Батбаатар, Улсын Их Хурлын Тамгын газрын Захиргаа, хүний нөөцийн хэлтсийн дарга Б.Пүрэвдагва, Дархан-Уул аймгийн Засаг даргын орлогч Б..Жавхлан болон албаны бусад хүмүүс, иргэдийн төлөөлөл оролцлоо.