Аймгийн ИТХ-ын Тэргүүлэгчдийн тогтоолоор 2015 оныг “Баялаг бүтээгч, бизнес эрхлэгчдийг дэмжих жил” болгон зарласан.  Энэ хүрээнд Дорнод дээд сургуулиас Жижиг, дунд бизнес эрхлэгчдэд зориулсан урт, богино хугацааны сургалтуудыг үе шаттай зохион байгуулах боломжтой талаар аймгийн ИТХ-ын Ажлын албанд саналаа ирүүлэв. Тус сургуулиас 06 сард “ЖДБ-ийн маркетингийн төлөвлөгөө боловсруулах нь” сэдэвт байгууллагын онцлогт тохирсон төлөвлөгөө боловсруулах аргачлалын сургалт, “ЖДБ эрхлэгчдэд зориулан санхүүгийн тайлан тооцоог Excel программаар программчлах арга зүй” сэдэвт ААН-ийн тайлан баланс болон татварын тайлан гаргаж сурах сургалт, “Албан бичиг хөтлөлтийн сургалт”, “Аялал жуулчлалыг хөгжүүлэх менежментийн асуудал” сэдвүүдээр тус тус үнэ төлбөргүй сургалт зохион байгуулах юм. Мөн байгаль орчны экологийн тэнцвэрт байдлыг алдагдуулахгүй орчин үеийн халаалттай байшин барих аргачлалыг зааж, бага орлоготой залуучуудын өрхийн амьжиргааг сайжруулахад нөлөөлөх “Амины тохилог орон сууцыг хямд зардлаар барих боломж” сургалтыг төлбөртэй зохион байгуулах бүрэн боломжтой ажээ. Түүнчлэн мэргэжлийн багш оюутнуудын хамтарсан баг ЖДБ эрхлэгчдийн захиалгын дагуу төсөл боловсруулж, төслийг хэрэгжүүлэхэд заавар зөвлөгөө өгч ажиллах юм.