Сумын ИТХ, ЗДТГазартай хамтран иргэдийн гар дээрх бэлэн мөнгөний хомсдол, байгаль цаг уурын нөхцөл байдлаас шалтгаалан өвөлжилтийн бэлтгэл ажил хангах, иргэдийг түр ажлын байраар хангах зорилгоор энэ удаагийн хэлэлцүүлгийг зохион байгууллаа. Хэлэлцүүлэгт ЗДТГ-ын байгаль орчны алба, Батширээт сум дундын ойн анги, нөхөрлөлүүдийн холбоо, ойн мэргэжлийн аж ахуйн нэгж, иргэдийн бүлгээс нийт 28 төлөөлөл оролцлоо.
Сумын хэмжээнд нийт 25 иргэдийн бүлэг байгуулагдан Ойн мэргэжлийн эрхтэй байгууллагын туслан гүйцэтгэгчээр гэрээ хийн ойн цэвэрлэгээний ажил хийж түр ажлын байраар хангагдан ажиллаж байна. Мөн ойн мэргэжлийн ААНэгж 5, ойн чиглэлээр 18 нөхөрлөл үйл ажиллагаа явуулдаг юм. Эдгээр ААН, нөхөрлөл, иргэд сумын айл өрх, албан байгууллагын түлээний хэрэгцээг хангахаас гадна Хэнтий аймгийн Хэрлэн сумын түлээний хэрэгцээг хангах зорилготой юм.
Тус хэлэлцүүлгээс худалдан борлуулах түлээг газар дээрээс нь 20000 төгрөгөөр худалдах. Мод бэлтгэлийн ажлыг хуулийн хүрээнд зохион байгуулах ЗДТГ-ын байгаль орчны мэргэжилтэнгүүд цаг тухай бүр хяналт тавьж ажиллах зэрэг саналууд дээр харилцан тохиролцлоо.
