Номын өргөөг нээх ёслолд Чингэлтэй дүүргийн Иргэдийн Төлөөлөгчдийн Хурлын дарга Д.Бат-Эрдэнэ, дүүргийн ИТХ-ын Төлөөлөгчид, Хурлын ажлын албаны дарга Ц.Алтанцацрал, Зохион байгуулалтын хэлтсийн дарга Ж.Ганбат, Иргэний оролцооны хэлтсийн дарга Т.Уламбаяр болон хороодын Иргэдийн Нийтийн Хурлын дарга, Иргэний танхимын ажилтнууд оролцов.
Дүүргийн ИТХ-ын дарга Д.Бат-Эрдэнэ ёслолын үйл ажиллагааг нээж хэлсэн үгэндээ, “Явуугийн цэцэрлэг, Тусгаар тогтнолын талбай, гэрэлт хөшөө гээд олон сайхан оюунлаг бүтээн байгуулалт дүүргийн Засаг дарга Д.Ганболдын санаачилгаар өрнөж, ажил хэрэг болж буй”-г онцлон тэмдэглээд, тэдгээрийн үргэлжлэл болж, Хүүхдийн номын өргөө нээгдэн, хүүхэд багачуудаа хүлээн авахад бэлэн болсныг онцолсон юм. 5 жилийн өмнө барилгын зураг төслийг боловсруулахаас эхлээд номын өргөөг нээх хүртэл хөрөнгө оруулалт, тоног төхөөрөмж гээд бүхий л зүйлд Чингэлтэй дүүргээр овоглодог, ажиллаж амьдардаг, бизнес худалдаа эрхэлдэг аж ахуйн нэгж байгууллага, төрийн байгууллагын ажилтан, албан хаагч олон хүний оролцоо асар их байсныг тэмдэглэн хэлэв.
Дүүргийн ИТХ-ын Тэргүүлэгчдийн хуралдаанаас 14 хоногийн ном хандивлах аян зохион байгуулахаар уриалга гаргасан билээ. Үүнд ИТХ-ын Ажлын алба, Төлөөлөгчид, Иргэдийн нийтийн хурлын дарга, Иргэний танхимын ажилтнууд хамрагдсан бөгөөд ИТХ-ын дарга Д.Бат-Эрдэнэ хандивын номын дээжийг номын сангийн эрхлэгч Ц.Баянмөнхөд гардуулан өгсөн юм.
Мөн Чингэлтэй дүүргийн 19 хорооны Иргэдийн нийтийн хурлын дарга нарыг төлөөлөн, 5 дугаар хорооны Иргэдийн нийтийн хурлын дарга, шинжлэх ухааны доктор, профессор, Хүмүүнлэгийн ухааны академийн академич Н.Содномдорж, 7 дугаар хорооны Иргэдийн нийтийн хурлын дарга Д.Баянбат нар номын цагаан буян дэлгэрэхийг ерөөгөөд хандивын номын дээжээс өргөн барьсан бол дүүргийн ИТХ-ын Төлөөлөгч, 13 дугаар хорооны Иргэдийн нийтийн хурлын дарга Ц.Рэнцэндорж “Номын сайн нөхөр” үнэмлэхийг тэмдгийн хамт хийлгэж өгөхөөр амласан юм.
