Сумын ариун цагаан хөдөлмөр, төлөв даруу зангаараа нутгийн олондоо хүндлэгдэж, үр хүүхээ өв тэгш өсгөн хүмүүжүүлж, амьдралын зөв зам мөрөөр үлгэр дууриалалтай ажиллаж амьдарч байгаа гэр бүлийг алдаршуулах,  нутгийн зон олны итгэлийг хүлээж аймаг, сумын ИТХ-ын төлөөлөгч, багийн ИНХ-ын даргаар олон удаа сонгогдон сумын эдийн засаг, нийгмийг хөгжүүлэхэд оруулсан хөдөлмөрийг үнэлэх, эрхэлсэн ажилдаа амжилт гаргасан албан хаагчид, иргэдийг урамшуулах зорилгоор “Түвшин сайхан гэр бүл”, “ИТХ-ын нэрэмжит шагнал”, “ИТХ-ын Дурсамж” гэсэн 3 шагналыг 2014 онд бий болгож жил бүрийн сар шинийн баяраар олгож байгаа билээ.

Сумын ИТХ-ын Тэргүүлэгчдийн 2019.01.29–ны өдрийн А/02 дугаар тогтоолоор  дээрх шагналын эздийг тодруулсан бөгөөд “Түвшин сайхан гэр бүл”-ээр Бэрх багийн малчин, Х.Жанчивдоржийн гэр бүл, ИТХ-ын Нэрэмжит шагнал”-аар ерөнхий боловсролын сургуулийн багш Б.Нямсүрэн, ЭМТ-ийн их эмч О.Наянтай, “ИТХ-ын Дурсамж”-аар Бэрх багийн иргэн Д.Эрдэнэчулуун, Б.Батболд нар тус тус шалгарч шагнууллаа.