1992 оны 09-р сарын 18-нд сумын иргэдийн Төлөөлөгчдийн Хурал 30 төлөөлөгчдийн бүрэлдэхүүнтэйгээр анх байгуулагдаж, ИТХ-ын анхны даргаар / орон тооны бус/ Г.Осор, нарийн бичгийн даргаар Ц.Буянцогт нар сонгогдон ажиллаж байжээ. Аймгийн ИТХ-ын анхны төлөөлөгчөөр Мичидийн Адъяатулгат, Жамцын Амарсайхан, Гүржавын Дамчаабадгар нар сонгогдсон.

Монгол Улсын шинэ үндсэн хуулиар батлагдсан нутгийн удирдлагын хосолмол зарчим хэрэгжиж эхэлснээс хойш нэгэн бүрэн эрхийн хугацаа өнгөрч, орон нутгийн хурал захиргааны байгууллагын төлөвшил бий болж, зах зээлийн харилцаанд шилжих үеийн эдийн засаг, нийгмийн хүндрэл бэрхшээлийг даван туулах, сум орноо хөгжүүлэх хэтийн бодлого чиглэлийг оновчтой тодорхойлж, хэрэгжүүлэхэд үйл ажиллагаагаа чиглүүлж ирсэн.

Суманд Нутгийн өөрөө удирдах ёс хөгжих эрх зүйн үндэс бүрэлдэн тогтож, ажиллах орчин боловсронгуй болж, суурь болон салбарын хуулиудаар хурал, захиргааны байгууллагуудын эрх хэмжээг хуульчилж өгснөөр нутгийн захиргааны байгууллага төлөвших хөгжлийн шинэ шат дуусч, хөгжлийн шинэ үе шат эхэлсэн байна

Аймаг, сумын ИТХ-ын төлөөлөгчдийг сонгох 4 дэх удаагийн сонгуулиар бүрдсэн 20 төлөөлөгчтэй сумын ИТХ-ын анхдугаар хуралдааныг 2004 оны 11-р сарын 08-ны өдөр хуралдуулж ИТХ-ыг байгуулсан.

Орон нутгийн 5 дахь удаагийн сонгуулиар сумын иргэдийн Төлөөлөгчдийн Хурал 21 төлөөлөгчдийн бүрэлдэхүүнтэй байгуулагдаж, ИТХ-ын даргаар Д.Төмөр гурав дахь удаагаа, нарийн бичгийн даргаар Ц.Буянцогт тав дахь удаагаа сонгогдон ажиллажээ.

2012 онд болсон Орон нутгийн сонгууль нь хувь тэнцүүлсэн хэлбэр буюу пропорционал системээр нэрээр болон жагсаалтаар сонгосноороо өмнөх сонгуулиудаас онцлог юм. Шинэ хуулиар Аймгийн ИТХ-д 1, орон нутгийн ИТХ-д 27 төлөөлөгч үүнээс 18 нь нэрээр, 9 нь жагсаалтаар сумын ИТХ-ын төлөөлөгчөөр сонгогдсон. 2012 оны 12-р сарын 04-нд сумын ИТХ-ын анхдугаар хурлаа хийж, хурлын төлөөлөгчдийн бүрэн эрхийг баталгаажуулжээ.